منى زكي عن فيلم أصحاب ولا أعز:"جماعة دا تمثيل ومش بقصد أثير الجدل"

تصوير- علاء أحمد:

أكدت النجمة منى زكي أنها لم تقصد في أي وقت إثارة الجدل، ولكن العمل الفني يناديها وتوافق على تقديمه، دون أي حسابات أخرى، خاصة وأنها تعمل مع صناع تعرف حبهم للفن والصناعة.

منى زكي والاعمال المثيرة للجدل

وتابعت منى خلال جلسة تكريمها في مهرجان الجونة السينمائي اليوم الجمعة التي أدارها المخرج محمد ياسين: "الناس بيبقوا فاكرين إني قاصدة أعمل حاجة تثير الجدل، بس الحقيقة إني اتندهت للعمل ده، أكيد بقدر الناس اللي بتحبني وعلى راسي والله ويعنيلي حاجة كبيرة إني أقابل حد ما عرفهوش ويقولي كلمة حلوة، بس الفن مش هينفع تبقى ماشي عشان فيه وجهات نظر اجتماعية".

واستكملت "الفن فيه حرية وانطلاق وتسرح بخيالك وتتخلص من قيودك وتعبر بأشكال مختلفة، مش فكرة إنك عايز تعمل حاجة تثير الجدل وتضايق مين، بتبقى اتندهت للشخصية دي والورق ده، مش مقصود أضايق حد واخد عني صورة معينة، هو كمان غلطان أنه واخد عني صورة، ما هو ما يعرفنيش، أحيانا بتحس أنك عايز تقول والله ده تمثيل".

فيلم أصحاب ولا أعز

وعن تجربتها مع فيلم أصحاب ولا أعز، حكت منى "اتندهت لحدوتة وشخصيات، أنا مش بحسبها يا اتنده للشيء أو لأ، وبقدم التجربة مع ناس أنا واثقة فيهم، وكان فيلم اتعمل منه فوق الـ100 نسخة في العالم".

وأضافت "جماعة ده تمثيل، معقولة هقعد أشرح إن ده تمثيل وأشرح اللقطة اتاخدت إزاي، لأ مش هقدر أنزل للجزء ده".

وسألها المخرج محمد ياسين هل قررت ألا تغامر مرة أخرى، وأجابت مازحة "حرمت يا بوجي.. لأ أنا محرمتش بهزر، أنا بعمل اللي بحبه بس ومش قصدي أتسبب في أي أذى لأي حد".

مينا مسعود عن مهرجان الجونة: "المهرجان الأجمل في الشرق الأوسط"

منى زكي عن أحمد حلمي (مازحة): الكوميديانات ناس هادية على الحقيقة وبيعانوا من كآبة بالبيت