محمد الشناوي يوضح حقيقة "الخناقة" مع جمهور الأهلي بعد مباراة باتشوكا و"التهديد بالرحيل"

كشف محمد الشناوي، حارس مرمى الأهلي، حقيقة شجاره مع جماهير الأهلي عقب الخسارة من نادي باتشوكا المكسيكي في نصف نهائي كأس إنتركونتيننتال.

قال "الشناوي" خلال مداخلة هاتفية في برنامج "الكورة مع فايق"، مع الإعلامي إبراهيم فايق: "في كلام اتقال إني اتخانقت مع بعض من جمهور الأهلي، الكلام ده غير حقيقي وميحصلش مني بعد التاريخ ده كله في الأهلي تصرف زي ده، وجمهور الأهلي على راسي وليه كل التقدير والاحترام وهو الضهر والسند وليه فضل كبير عليا وعلى طول بطلع بقول الكلام ده إن أنا موجود في كيان كبير وبحب النادي الأهلي وجمهوره وبعتذرلهم تاني على ماتش امبارح".

أشار: "أنا بعتذر بالنيابة عن نفسي وعن زمايلي لكل جمهور الأهلي اللي زعل مننا امبارح بعد الهزيمة من باتشوكا بس ربنا يعلم إحنا عملنا أقصى جهد عندنا في الماتش طول 120 دقيقة لغاية ضربات الجزاء بس ربنا ما أردش، قدر الله وما شاء فعل".

كما تحدث عن الخسارة من باتشوكا: "الجمهور لازم يعرف إن اللاعيبة كانت في صدمة امبارح، كان عندنا حلم كبير جدا إننا نوصل النهائي، إحنا لغاية دلوقتي مش مصدقين ومقدرين اللي حصل من الجمهور امبارح لأنه كان زعلان علشان دي كانت فرصة كبيرة إننا نوصل للنهائي وكان حلمنا نلاعب ريال مدريد، بالنسبة لنا إحنا كنا في صدمة امبارح".

كما نفى تهديده بالرحيل عن الفريق: "أنا عمري ما اهدد جمهور النادي الأهلي إني همشي، الجمهور فضله عليا وعلى كل اللاعيبة اللي موجودة وهو بالنسبة لنا رقم واحد وعلى طول بقول الكلام ده، وأنا أهم حاجة عندي مصلحة النادي، أهم مني ومن أي حد".

أوضح: "المشهد اللي حصل امبارح هو بس الفيديو مقطوع وجه من الآخر مش من أوله.. إحنا كنا قاعدين على الدكة والجمهور متضايق وبيتكلم مع اللاعيبة، أنا طلعت اتكلمت مع الجمهور وبهديهم لأنهم كانوا غضبانين جدا".

أردف: "وبقولهم أنا عارف إن أنتوا زعلانين وحقكوا علينا، ده في الأول خالص وبعدين رجعت قعدت على الدكة، وخدت لاعيبتي ودخلتهم أوضة اللبس علشان محدش يتكلم مع الجمهور.. دكتور أحمد جاب الله بيقولي أمشي فأنا بقوله أنا ماشي، همشي خلاص، فيه واحد من الجمهور جه من بعيد وقال لفظ شتمني، أنا قولتله شكرا وأنا همشي خلاص، قالي ما تغور، أنا في الوقت ده انفعلت وده اللي ظهر في الفيديو وافتكروا إني بقول للجمهور أنا همشي من النادي وبهدد الجمهور، أنا بقول همشي يعني داخل الأوضة".