الكيمياء تبكي طلاب الثانوية، الأباء: وجعوا قلوب ولادنا، والنشطاء: عايزين امتحان تفصيل

أثار امتحان "الكيمياء"، الذي أداه طلاب الثانوية العامة اليوم، جدلًا واسعًا بين نشطاء مواقع التواصل الاجتماعي. بعض الطلبة أكدوا صعوبة أسئلة الامتحان، في الوقت الذي أوضح فيه أولياء الأمور أن أبنائهم فقدوا الشغف والأمل بسبب صعوبة الامتحان، أكد النشطاء أن الاجتهاد واستذكار الدروس بشكل جيد هو الذي يساعد الطلاب على الحلول السليمة.

إمتحان الكيمياء يصيب الطلاب بالانهيار

وعلقت البلوجر سناء عادل على امتحان الكيمياء في الثانوية العامة قائلة: "وجعوا قلب ولادنا حرام اللي بيحصل ده والله ابني فقد الشغف وفقد الأمل أنا مش عارفة أقول أيه"

ورد البلوجر أحمد عبد الحميد فقال: "هو بجد في ايه؟ كل الطلاب في كل الامتحانات طالعين منهارين من البكاء مفيش ولا امتحان حلو.. هو أنتم كنتم بتذاكروا مواد مختلفة طول السنة".

وقال البلوجر محمد ميسرة "هي ايه الموضه الجديدة دي.. بكاء بس بالمذاكرة والاجتهاد ربنا هيكرمك مهما كان صعوبة الامتحان هنقعد نتحجج بالفشل جيل غريب وصعب جدًا".

وكان للبلوجر أحمد عبد الله رأي آخر عن صعوبة امتحانات الثانوية العامة، حيث قال: "الامتحان والله سهل ومعظم الأفكار من النماذج والوقت كافي. الطلاب معظمهم مش بيذاكروا بضمير أو بيذاكر غلط والوقت كويس".

ورد مدرس الكيمياء نبيل هشام قائلًا: "للأسف بعد الاطلاع على الامتحان كاملًا، الامتحان تقيل وعايز نفس طويل جدًا، وخصوصًا المسائل تقيلة على الطلاب، هو حرام كده بصراحة عليكم".

امتحان الكيمياء صعب وتقيل

وقال  عبد الحميد حسين، طالب: "امتحان الكيمياء صعب وتقيل المراقب أخد مني الورقة وكان فاضل ليّ ١٠ أسئلة متظللوش".

أما الطالب عمرو بيشو فعلق قائلًا: " مش عارف ده تعليم ولا انتقام من طلاب علمى".

وقالت الطالبة رانيا محمود: " طالعة من امتحان الكيمياء حرفيا زي التايهة ومستنيه حد يكلمني أعيط  جيت طالعة من البوابة اتفاجأت بابا بيقولي يا رانيا جريت عليه حضنته عشان أعيطله لقيته فاطس ضحك وأنا في حضنه روحت ضحكت أنا كمان لقيت كل اللي حواليا اللي كانو بيعيطوا بيبصوا وبيضحكوا".

ورد البلوجر أحمد مسعد قائلًا: "الطلاب عايزين امتحان تفصيل.. معنى البكاء والانهيار إننا لن نرى أوائل الثانوية العامة هذا العام، ولن يكون هناك ناجحين ومتفوقين".

وقالت البلوجر لينا عبده: "كفاية حرقة دم بقي هم بيجيبوا الامتحانات من كوكب المريخ هو مش من اللي درسه الطالب.. ليه الدراما... عجبي على طلاب الزمن ده".

الطلاب اللي استخدموا السماعات حلوا كويس

وقالت أحد أولياء الأمور البلوجر آيه محمود: " امتحان الكيمياء كان صعب جدًا جدًا أقسم بالله ما نمت من امبارح ولا غمضت عيني لحد دلوقتي بسبب أنا عايزه أطمئن على الأولاد كلهم في الامتحان، والأمهات والآباء بالله عليكم هونوا على أولادكم وما تشدوش عليهم واللي حصل في الامتحان الامتحانات كلها طالعة وحشة وكل اللي كان طالعة بتعيط من الامتحان الكيمياء بالله عليكم ما تبقوش ضاغطين على الأولاد، وما تخلوش ابن بيمتحن يحس بضغطكم أو أن أنتم هتزعقوا أو هتعملوا أي حاجا فيحصل للولد حاجة، بالله عليكم هونا على عيالكم مش هيبقي انتوا والكيمياء والفيزياء عليهم".

وعلقت البلوجر حكمت إبراهيم قائلة: "حسبنا الله ونعم الوكيل ابني طول الليل والله لم ينام وقام يترعش ومثلج".

وقالت البلوجر ماجدة ناجي: "المحزن الأولاد الذين استخدموا السماعات في الإجابة على الامتحان، وطالعين يقولوا كان حلو حسبنا الله ونعم الوكيل".