رامي إمام: الشعب المصري يحب الضحك والجمهور يطلب جزء ثاني من فيلم غبي منه فيه

تصوير- أحمد مسعد:

قال المخرج رامي إمام إن أول فيلم كوميدي قدمه كان فيلم غبي منه فيه، ووقتها كان يتلمس طريقه في مدى قدرته على صناعة عمل كوميدي وهل يمتلك هذا الحس أم لا.

فيلم غبي منه فيه

وتابع رامي في لقاء مفتوح أقيم ضمن فعاليات الدورة السابعة والأربعين من مهرجان القاهرة السينمائي الدولي، وأداره الناقد محمد سيد عبدالرحيم، مدير أيام القاهرة لصناعة السينما: "أول فيلم كوميدي عملته كان غبي منه فيه، كنت لسه بتلمس فكرة هل عندي الحس الكوميدي ولا لأ، ولغاية دلوقتي كل ما أمشي يتقالي عايزين جزء تاني من غبي منه فيه كأني معملتش غيره".

وأصاف "تشربت الكوميديا لإني في بيت فيه ده وكان لا يمكن أني اعيش فيه ولا أتشرب منه، وعملت مسلسل في منتهى الكوميديا هو عايزة أتجوز، وإحنا كشعب بنحب نضحك ونهرج مع بعض".

فيلم أمير الظلام

وعن تجربته مع أول فيلم روائي طويل "أمير الظلام" بطولة والده الزعيم عادل إمام، وصف الأمر بأنه كان مسؤولية كبيرة، مضيفا "في البيت اتفرجوا على فيديو كليب من إخراجي للفنانة شيماء سعيد، عجبهم جدا، ووالدي قالي انت اللي عامل ده، قلتله والمصحف أنا اللي عامله، وفي مرة لقيته قالي أنت هتخرج فيلم اسمه أمير الظلام قلتله لا يمكن، بس هو معملش كده غير لما شاف شغلي في المسرح والفيديو كليب".

رامي إمام: عمي خاصمني بعدما وافقت على إخراج أمير الظلام

وأشار إلى أن عمه المنتج الكبير عصام إمام، أخذ منه موقفا وخاف على الفيلم لأنها تجربته الأولى كمخرج، موضحا "عمي خاصمني وقعد فترة مش طايقني وباصصلي شزرا وجواه بيقول الفلوس راحت، وبدأ ينزل معايا المعاينات ويحس إني فاهم شوية".

فيلم حسن ومرقص

وحكى رامي تجربته مع فيلم حسن ومرقص، مشيرا إلى أنه رفض في البداية تقديمه رغبة في أن يشق طريقه بعيدا عن والده "الزعيم" عادل إمام، ووقتها كان سيتعاقد مع المنتج وائل عبدالله على تقديم 3 أفلام، وعرف الأخير بالأمر فنصحه بالعودة للفيلم.

وتابع رامي "فيلم حسن ومرقص له خصوصية، وأخذنا رأي الكنيسة والأزهر والحمد لله خرج الفيلم وأول عرض كان في الأوبرا وده كان حدث بالنسبالي كبير جدا. وبالمناسبة أسهل اتنين تقدر تقودهم في التصوير عمر الشريف وعادل إمام، لأنهم محترفين وبيشتغلوا على الورق بيقولوا آراءهم في البداية ووقت التصوير خلاص القيادة للمخرج".

المخرجة هناء العمير: "جحيم العابرين" تجربة تعتمد على الغموض والتشويق النفسي

بطل فيلم همام في أمستردام يحضر عرض فيلم ابنته أشجان الهمص بمهرجان القاهرة السينمائي